Freunde vonD` Lehr und de Teeniebricht vom Luca
Am Sunntig, 2. Auguscht hät dä Gery mit ihm dä Grawattechnopf güebt und ihn sehr globt, er hebi das rassig gschnallt! Papparazzi Mami hät das leider verschlafe - ja - mer müessti halt zur rächte Zyt is Näscht und nid erscht, wänn anderi scho bald wieder ufschtönd :-)
Gägä Mittag bin i dänn aber au uuf gsi - also Generalprob für d "Aaleggi" im Coop:
und Papparazzi Mama isch flissig
Hoffentlich chlämmts der nid d Luft ab, Luca :-)
- Und jetzt nimms Glettise fürä Muetter, die Teils bruched dringendscht eis - und mär hät ja suscht nüüt z tue :-)
Am halbi nüüni muess er aaträtte.
Und ich - wo doch nie sone Gluggerä gsii bin und wo so stolz bin uf ihn - won er da mit Hämpli und Grawattä und sinerä Umhängetäsche ganz stolz zum Huus us isch churz vor dä siebnä - da hät mich s hüülend Eländ übercho!!!
Jetzt isch er ändgültig flügge, min Puurscht!
Han dänn dä ganz Tag ziemlich dä schlächt gha, erscht gäge dä Abig ischs es bitzli bessär gangä.
Er hät en super Start gha. Das hät mich für ihn gfreut. Ich findä di erschtä Iidrück im Bruefsläbe sehr wichtig.
Und dass s Läbe nid ganz billig isch, hät er dänn scho i dä erschte Wuche gmärkt...
Will er ja erscht ändi Monet sin erschte Lohn hät, muess ich ihm ja im Momänt no ab und zue es Nötli zuesteckä, und a dä erschtä zwei Täg isch er dänn munter eimal an Dönerstand und eimal ad Würschtlibude vor em Coop gschtiflet. Am Mittwuch hät er frei gha und am Dunnschtig und Friitig än Iifüehrigskurs z Dietike. Det isch aber alles zahlt worde vom Coop. Am Samschtig häts dänn aber scho ganz anderscht tönt, won ich ihm es zwänzgernötli gäh han. Ganz treuhärzig: Mami, muesch mir doch nid immer so viel gäh, susch häsch dänn du plötzlich nüt meh...
So hät er dänn am Samschtig vo dem Zwänzgernötli gläbt, am Mäntig au und won ich ihn dänn am Ziischtig gfräget han, öb er no öppis bruucht, hät er gseit: Nur wenig, er hebi no chli vorig, er chaufi zum Znüni en Schoggigipfel, für dä Tag en anderthalb Liter Iistee und zum Zmittag es Päckli Uufschnitt und es Brötli. Nur vo Frücht hät er nüt verzellt, däbi hät er das megagärn, aber glaub, dä Vitaminschueb muess ich ihm ab jetzt vo dihei mitgäh...
Und zum Znacht überchunnt er ja immer öppis rächts warms.
Ja, d Umschtellig vo dä Schulebank is Bruefsläbe isch sicher nid eifach!
Das hät mer au a sinere Luune gmärkt am Dunnschtig und am Friitig Morgä - s isch eifach nüt rächt gsi :-)
Und sit em Mäntig isch er mega guet gluunet. Verzellt am Abig und er nimmt sini Lehr sehr ärnscht. So hät er müesse en Plan mache, wo welles Rayon isch i dem Coop, das hett er au chöne vo Hand skizziere, aber er hät das genaueschtens am PC gmacht. Dä Gery und ich sind sehr beiidruckt gsi.
Grinsend hät er eus dänn au no e Aktion vom Coop zeiget:
UUhhpps!!!
Viel Vergnüege, Luca - jetzt weisch, was d z tue häsch...
Aber dänn isch er vor de PC ghocket und hät vom Rescht es genaus Budget planet im Excel....er häts öis dänn zeiget und ich han müesse säge, hät er guet gmacht - aber chann ers au ihalte? Bin mal gschpanne....
Er machts superguet- zwüschedure isch er mal gnärvt - und git patzigi Antworte, aber meischtens isch er guet gluunet. Sie händ en gärn z Dietlike im Coop - so isch er au gfräget worde, öb er nach de Bruefsschuel no mal würdi is Gschäft, wills Personalmangel hebid i de Brotabteilig - und da isch er bereitwillig gange...
Natürlich isch er au happy mit sim GA, öise Bähnler - aber er nimmts sehr gwüssehaft - am Sunntig wird zerscht für d Bruefsschuel glernt und dänn erscht uf d Pischte...
Und wie de Luca isch, lieb aber au clever, hät er zu mir gseit: Mami, du häsch ja eh gseit, zahlisch au öppis a das GA dezue und das mit somene softblick us grosse graublaue Auge, dass mer chönnti schmelze...
Und grad witer hät er gseit - aber nächscht Monet tuen ichs sicher uf d Siite - aber ebe am 6. Oktober flüged mir uf Hamburg, für zwei Wuche und dänn wird das GA Gäld det sicher im HSV Shop versickere..... will früehner oder später ziehts ihn z Hamburg in HSV Shop............. :-)
Aber ich verstahns irgendwie au, er isch jetzt i d Lehr cho, verdient sis erschti Gäld und isch natürlich megastolz, dass er nüme nur Sackgäld hät, sondern Lohn....
Aber glaub susch hät er s im Griff mit sim Lohn - dä nächschti Lohn chunnt ja erscht i 8 Täg und won ich ihn grad vorig gfräget han - Luca, langet der s Gäld bis zum Zahltag - hät er grinsed und gseit: Mami, s Läbe isch voll überrraschige.....
Ja guet - lahn mich überrasche, aber glaube nid, des er mich go apumpe chunnt - sis Grinse hät mir gnueg gseit :-)
Hoffentlich blibts, s wär schön aber es isch ja scho mal en Superstart gsi.
Guet, so hät halt es Nötli dä Wäg vom Portmone uf sin Schribtisch gfunde ...
Uf hüt hät er müesse en Bricht schribe über d Hygiene und d Läbesmittelkontrolle im Coop und was es für Konsequenze hetti, wänn die Vorschrifte nid iighalte würdid - und won er mir sini Arbet zeiget hät hani müesse säge, häsch würklich guet gmacht...
Und grad isch er wieder a de Budgetplanig für de nächscht Monet - lueged mer mal, öbs dasmal gyyget....
Und geschter hät er sin Rayonleiter chli uf d Schippe gno, aber nid uf abschetzigi oder bösi Art - er respektiert en sehr - aber de Rayonleiter hät en südländische Iischlag und ebe halt sini eigeni Art, wänn er de Luca id Pause schickt - öis häts fascht putzt vor Lache, wo de Luca das zum Beschtä gäh hät :-)
Hüt hät er wieder Bruefsschuel gha de ganz Tag und wieder Prüefigsergäbnis übercho: 4.5 in Gsellschaft und 4.9 i Warekund. Super... Bsunders d Note in Warekund sind sehr wichtig
Wow, am Samschtig, 3. Oktober hät er öis aber e Show anegleit… scho am Morge früe isch er hässig, pampig und hät agfange es Drama mache um nüt und wieder nüt – nur will er statt emene Hämpli hät welle es Tischi alegge und grad keis glettet gsi isch…
Han ihm dänn gseit, aber am Samschtig därfsch ja gar nid im Tischi go schaffe, da muesch ja im Hämpli und Grawatte und da hätt er ghässelet – aber ebe hüt ja mal nid…
Und uf mini Frag, öb mir das dänn händ chönne wüsse, git er stinkfräch zur Antwort: de Daddy segi schliesslich Huusmaa und hetti dä ganz tag Zyt zum Glette!!!
Da sind de gery und ich natürlich au chli hässig worde ( sone Luune bruched mir ja am Morge am sächsi!!!)und ich han ihm gseit – gang im Hämpli oder lass es blibe, und da staht er vor mich ane und seit, ich sölli ändlich mal ufhöre ihn z Provoziere…….
Han dänn gseit, so, Luca bis mal chli friedlich und er meint: Ja, jetzt provoziersch mich scho wieder!
So isch er mit missmuetiger Miene und demonstrativ verschränkte Arme uf em Sofa ghocket und hät e Luune verströmt, dass mer d Schär hät müesse näh, zum d Luft verschnide. Han en gfräget, öb er würklich Striit welli und da isch er aber scho e chli zuegänglicher worde und hät gseit, nei, aber wänd ihr würklich überes Tischi strite…
Mir? Hoppla, han glaub öppis verpasst – wer hätt den da aagfange z Schtürme…
Bin dänn chli frustriert go schaffe und han dänkt, hoffentlich fangt er jetzt nid a so richtig z pubertiere – bis jetzt hämmers halt würklich ring gha mit öisem Teenie…
Aber wo dänn de Gery an Kiosk cho isch hät er mir gseit, de Luca segi nachär wieder ganz friedlich gsi und er hebi ihm no es Tischi büglet – de Luca hebi ihm gseit, er bruchi hüt keis Hämpli, will er die erschti Lehrlingssitzig hebi – Aha – da isch s zwänzgi abe bi mir…
De Luca isch doch eifach supernervös gsi vor dere Sitzig und hät Schiss gha, dass er öppis nid rächt chönnti mache…
Am Namittag isch er anen Match z Wetzike und hät eigentlich nomal wellä churz heicho, bevor er in Thurgau gaht zu sinere Nici go übernachte. Und so hät er es Sms gschribe, er gängi direkt zu de Nici und d Bruefsbildnerin hebi ihn sehr globt für sini guete Schuelnote und für d Lehr – wiiters so!
Und ich - ja, bin e chli es Tüüfeli gsi – aber e chli Straf muess si – und han nur zruggschriebe: Bisch wieder friedlich?
Sini Antwort: Ja bini (mit eme Smiley) und sorry wäg hüt Morge (mit eme Brüelismiley)aber, was seisch zum Lob, bin soooo happy.
Und ich han natürlich zrugggschriebe: Bin meeeegastolz uf dich, mach wiiters so…
So, nach dem chliine „Hämplidrama“ sind mir dänn zerscht mal id Färie uf Hamburg. Wow isch wieder super gsi – aber dasmal hät s Wätter nid so ganz mitgspielt...
Mir händs trotzdem gnosse – sind mir ja scho s drittmal z Hamburg gsi und känned langsam öisi eggli, wos öis gfallt…
S isch uuhläss gsi mit em Luca, entgäge letschts Jahr, wo mer ihn ja fascht nur zum Zmorge und am Abig gseh händ, will er d U Bahne, S Bahne und Busse und überhaupt Hamburg so faszinierend findt, hät er dasmal richtig Luscht gha, immer öppis mit öis z undernäh… Super gsi mit dir Luca :-)
De Luca hät scho am Samschtig am 17. Oktober müesse heiflüüge will er am Mäntig wieder hät müesse id Lehr – uuh – bi dänn scho chli wehmüetig gsi, won er dänn da mit sim Goffer abzottlet isch… und er hetti am zwölfi sölle lande z Chlote und mir spätistens am eis Bricht gäh – aber bis nach de drüüne han ich nüt ghört vo ihm und bi immer chribbeliger worde. Won er dänn ändlich aaglütet hät, isch er e chli gnärvt gsi…dä Flüüger, won er z Hamburg hetti sölle iistige ischwäge schlächt Wätter z Hannover hangeblibe und so hät z erscht en Flugi vo Wien müesse iigfloge wärde… ja und dä hät dänn wäge schlächt Wätter z Chlote nid chöne Lande und de Luca isch z erscht mal z Kirchfeld glandet L ja aber irgendwänn isch er dänn doch no as rächti Ort an echo…..
Ja aber halt ebe Hamburg… s hät natürlich scho verlockt, es paar Souvenirs für d Nici z chaufe und ebe sälber bruucht mer au chli Sackgäld will de U Bahn Simulator isch ja de Hammer – ja und mit em Handy han ich ihn gwarnt, das segi Sacktüür, vo Dütschland id Schwiz und er hät gseit, er schribi nur eis Sms a d Nici pro Tag… aber er hät da glaub grosszügig no es null aaghänkt und no chli multipliziert – jedefalls hät er nach vier Tag sis Limit vo 70 Franke uusgchlöpft gha ;-) Und s Handy gschperrt!!!!
Ich hans eigentlich nid so tragisch gno, bis jetzt hät er pro Monet amigs nur so 1o – 12 Franke brucht – das isch jetzt s erscht mal gsi …. Aber er isch mega entsetzt gsi – sini Nici - unnereichbar für die näschste paar Täg :-(
Ja, so hät dänn öppe mis Handy de Wäg gfunde zu ihm, dass er de Nici hät chöne schribe :-)