Lehrstellsueche 2008

Aafangs 2008 muess sich de Luca mal Gedanke mache, was "us ihm söll wärde" :-)
Das staht aber für ihn scho ziemlich schnäll fescht - E Lehr im Detailhandel - am liebschte Bereich Läbensmittel...
So, D Summerferie sind vorbii - jetzt gilts Ärnscht... Lehrstellesuechi...
ACHTUNG - FERTIG - LOS!!!
So, aber z erschtmal zum Multicheck..... und de hät er mit Bravour bestande...
Als erschts bewirbt sich de Junior bi Migros Ostschwiiz  - ordentlichi Bewärbig mit Läbeslauf, Schuelbildig und de letschte Zügniss...und es schöns Deckblatt im Mäppli gsehnds au gärn... also git sich de Luca ordentlich Müeh :-)
Scho churz drufabe isch er iiglade worde zumene Gspräch mit de Bruefsbildnerin, z Gossau - und hät mir scho ufem Heiwäg ufs Natel aaglüütet - er hebi e Schnuppi im Migros Oberi übercho - und d Bruefsbildnerin hebi gseit, söttis det nid Gyyge, chönni er au no im Migros Seuzach, Seen oder Nöiwiese go schnuppere...
Am nächschte Tag isch de Marktleider vom Migros zu mir cho poschte am Kiosk und hät gseit, de Luca hebi en sehr guete Iidruck bi de Bruefsbildnerin hinderlaa... ja das fröit eim doch..
So, sini erschti Schnuppi... er hät de Plausch, während dere Wuche und de Bruef Detailhandel gfallt ihm, mit begeischterig isch er jede Morge ad Arbet - und hät am Samschtig nach de Schnuppiwuche zum Qualigspräch müesse - das isch dänn aber e chli ernüechterend gsii...
Zwar isch er eigentlich guet bewärtet worde - fründlich und höflich - mit guetem Umgang zu de Chunde - i de Metzg und de Frücht, sowie Brot hebi er gueti Leischtige zeiget aber ebe er segi i de Molki und i de Koli e chli langsam gsii - und hebi zwenig Frage gstellt...
Und so isch er i de gsamtquali bi Arbeitsqualität: brauchbar!
Bi selbständige Arbeitsweise: braucht viel Führung! und bi Interesse halt dänn grad als: mässig Interessiert! bewärtet worde... nur will er teilwiis zwenig Frage gstellt hät!!!
I de Gsamtbewärtig isch dänn aber doch gstande, dass de Luca für e Lehr bim Migros und au i dere Filiale in Frag chunnt....
De Junior brüetet über Bewärbigsschriibe - und mängisch tuet er mir fascht leid... er hockt hinder sim PC und isch wie blockiert - ebe er isch erscht füfzähni... eigentlich weiss er , wien er es Bewärbigsschriibe müest uufsetze und bringt trotzdem kein grade Satz ane... und frägt immer wieder: Mami, wie söll isch das schriibe - und ja, so härt dass tönt hanem scho Ratschläg - aber ebe han gseit - Luca s muess Dini Bewärbig sii, s därf nid nachem Mami töne, wos Diktiert hät...
Aber plözlich gahts doch... Er bewirbt sich bi Coop Ostschwiiz, bi Coop Züri, bi Migros Züri, bim Denner und  bim Volg...
Als Alternative zunere Detailhandelslehr im Bereich Läbesmittel zieht er e Lehr im Sportbereich in Betracht - und spricht grad sälber bi Ochsner Sport und Athleticum vor - aber det sind d Lehrstelle scho alli vergäh...
Vom Coop Ostschwiiz gits glii e Absag - alli Kandidate scho i de ängere Uuswahl - churz drufabe wird er iiglade zumene Gspräch mit de Bruefsbildnerin vom Migros Züri - und därf grad churz drufabe e Schnuppi im Migros Chloote mache...
Es gfallt ihm wieder sehr und wieder wird er au guet bewärtet - aber ebe wieder de "Tollge" er hebi z wenig Frage gstellt - und das wird halt grad wieder als desinteressiert beurteilt...
Min Kommentar dezue: Warum muess mer mit füfzähni scho soooo erwachse sii..........
Für de Migros Züri und Ostschwiiz mached mer öis nüme grossi Hoffnige....
Vom Denner und em Volg ghöred mer nie nüüt - und im Momänt hämmer nur no d Bewerbig Bim Coop Züri offe - ja und Zyt drängt e chli und ich säge am Luca - er bruchi e Alternative - und jag en zum Multicheck KV...
De Luca macht au schön brav mit - und bestaht de Multicheck au - allerdings nid grad so hochtrabend, wie de Multicheck Detailhandel - er bewirbt sich mal bi de SBB - aber chunnt sofort e Absag über - er hebi nonig die nötigi Schuelischi Riiifi...
De Luca seit definitiv: S KV interessier en nid so - und wänn er mal als Bähnlerfreak zur SBB welli, dänn uf anderem Wäg - er welli e Lehr im Detailhandel mache!!!
Ja und känn min Sohn - en Goldschatz - aber es "Widderli mit Hörnli" !!!
So bringts sicher au nüüt, wänn ich ihn wett dränge, no Bewerbige uf KV Lehrstelle z schriibe....
Nach de zweite Schnuppi, wo de Luca wieder als mässig interessiert bewärtet worde isch, nimmt de Daddy Gery ganz unbarmhärzig sin Sohn id Mangel: Warum und wieso, will er wüsse - und de Luca es bitzli hilflos - aber was sölli dänn fräge - s hät mer ja de Plausch gmacht!!!
De Dady Gery meint, so gäng das nid - und de Luca weiss eigentlich gar nid, was mer vo ihm will - er chöni ja nid meh als guet schaffe....
Ich han im Momänt grad anderi Sorge - mer händ nur no die Bewärbig bim Coop Züri offe (die bi Denner und Volg ja scho au no, aber das isch jetzt solang här, dass ich nüme dra glaube, dass mer öppis ghöred...) und befasse mich mal mit em 10. Schueljahr.
E Tragik wärs nid - de Luca isch en 94 Jahrgang und ebe scho mit vieri in Chindsgi cho und mit sächsi id Schuel - die meischte andere i sinere Klass sind 93 Jahrgäng - aber welles wärs richtige 10. Schueljahr für de Luca??? Mir händ da z Winti verschiedeni Aagebott...
Choschtepunkt wär öppe 1200 Franke - jä nu - mer chan s Gäld au für blöders uusgäh, als d Zuekunft vom Junior...
Aber bevor ich mir gnäueri Gedanke han chönne mache, welles 10. Schueljahr für de Luca s richtige wäri - därf er sich bi de Bruefsbildnerin bim Coop Züri go vorstelle - und überchunnt e Schnuppi im Coop Megastore Dietlike...
So, jetzt lauft de Daddy Gery zu sinere Topform uf  - und schleipft sin Jung quär dur alli Food Abteilige vom Megastore Coop Grüzemärt...
Det trimmt er als "alte Detaillischtehaas" de Luca fit für sini Schnuppi...
So, de Luca schnupperet also im Coop Megastore z Dietlike...
Er hät Mega de Plausch... und bereits am Mittwuch macht  de Herr Gairung e Bemerkig: Wänn er d Lehrstell würd übercho - eb er si dänn wür näh???  Das tönt ja scho mal goldig...
Am Samschtig hät de Luca s Qualigspräch gha - und de Herr Gairung hät ihm gseit, er würdi ih gärn id Uusbildig näh , er müessi sich aber no mit de Bruefsbildnerin bespräche - mir überchömed dänn öppe i 2 Wuche Bscheid!
Übrigens die Quali isch suuper gsi!!!!
Bereits am Ziischtig - drü Täg nachem Qualigspräch lüütet mer de Luca ufs Handy aa, woni am Schaffe gsi bin: MAMI ICH HAN D LEHRSTELL!!!!!!!!!
Er chan sis Glück chum glaube - und isch eifach nur Happy...
Ich hans im Momänt gar nid chönne fasse - han mich verhedderet bim rede, wonich ihm gratuliert han - und nachdem mer abghänkt händ bin ich voll Fröid  - vis a vis häts au grad no en Kiosk - über d Strass ghüpft, zum de Hedi - wo grad det gschaffet hät - die fröidig Nachricht überbringe - dass ich mir prompt de Fuess verknackst han :-)
Mir sind ganz zum Hüsli uus  und natürlich hanich grad huufewiis SMS abgschickt - und am Abig Telefon gstartet....
Am nächste Tag chunnt de Brief vo de Migros Ostschwiiz .... Sehr geehrter Herr Baumann, wir bedauern, Ihnen mitteilen zu müssen... und so wiiters und so fort....
Nomal en Tag später chunnt de Marktleiter vom Migros an Kiosk - öb de Junior de Brief scho übercho hebi - und ich han ihm gseit ja - und er hät gmeint - er wäri nid abgneigt gsii, ihn id Uusbildig z näh - aber ebe 2 vo sine Fachleiter hebid nid wellä (Koli und Molki - grad die zwei wones persönlichs Problem händ mit mir - schad chammer nid objektiv sii...)
Aber ich han ihm gseit ( bitzli triumphierend - gibi zue) ihr wäred eh e chli z spat choo...
De Marktleiter hät sich aber ehrlich gfreut und am Junior alles Gueti gwünscht...
Nomal paar Tag später.... ich han mers grad mit eme Buech (Thriller) gmüetlich gmacht... tschädderet s Telefon... d Fillialleiterin vomene Volglade im Tösstal am andere Ändi vo de Strippe: Sie hegi no e persönlichi Aaglägeheit z regle gha - und drum d Bewerbig vom Junior chli hineaagschtellt - aber sie wäri seeeehr interessiert...
Mir fröied öis uf drüü wiiteri spannendi Jahr mit em Luca....
Und wiiters gahts mit em Lehr und em Teeniebricht