D Lehr und de Teeniebricht vom Luca/2 - Seite 3

De Luca hät sich für en Freikurs in französisch entschiede - na ja - em Gery und mir wär Betriebswirtschaftan und für sich es bitz lieber gsi - aber mir händ ihm nid drigredt - er isch sächzähni - chunnt is 2. Lehrjahr und isch alt gnueg, sonigi Entscheidige sälber z träffe - und wänn er Freud a Sprache hät - so ischs sicher au nid verchehrt...
Und scho wieder e nöi Wuche....
De Luca hät es lässes Weekend gha - am Samschtig nach de Arbet isch er zu de Nici und de Sunntig hät er mit sim Halbbrüetsch - em Gery sim Sohn Tobias verbracht. Die zwei sind churzerhand is Strandbad uf Erlach gfahre - und händ jedi Mängi Spass gha mitenand. Und wie ichs au eigentlich nid anders erwartet han - hät geschter gäge Abig s Handy tschäderet - de Luca - eb er grad no bim Tobias därfi übernachte... klar doch!
Hüt isch er mit eme Kolleg go Bähnle - aber so gäge die achti isch de Wandervogel dänn doch mal no heicho...
... zum mir e chli später mal wieder "verlängerig" fürs Sandmänndli uuszrisse - eb er "uusnahmswiis" bis am halbi zwölfi därfi uufbliibe...
... Sind langsam chli viell uusnahme, Luca, aber er grinsed und blinzlet mit sim smart-soft-Teenie-Blick und fräget: Chasch du dem Blick widerstah Mami???
Ja, toll - wer hät jetzt da wen im Griff ??? :-)))
Anschiinend hät en de Tobias und s Bähnle aber e chli gschluuchet - er isch dänn aber doch scho churz nach de viertelab elfi id Fädere gschloffe...
Am Samschtig, 5. Juni hät de Luca Qualigspräch gha - und es isch suuper gloffe - da därf er ja jetzt ordeli stolz si uf sich (und mir platzed natürli au fascht vor Stolz) er hät e Suuuper Quali übercho.
So isch er grüehmt worde für sini Fründlichkeit - er segi Chundeorientiert - und trägi wesentlich zu de guete Stimmig im Team bi!
Wiiters hät er für sini Schuelnote e superbewärtig übercho - er lit im Durchschnitt immer no über 5,1!
Au ne gueti Bewertig hät er übercho für Qualitätskontrolle...
Zischtig 8. Juni

Hoppla Schorsch - de Luca hät nach längerem wieder emal sin "Grummel-Grummel-Närv-Mami-Daddy-löndmichinRueh- Abig :-)))))
Zum dänn aber doch später wieder ganz friedlich zwärde- zfriede chunnt er id Stube z spaziere, wos wieder emal Zyt gsi wär zum Schäfli zelle,blödelet e chli ume und fräget, eb er die 13 Minute vo geschter nid hüt chönnt naahole:-))) - ja und dänn häters gliich nid ganz nach dene 13 Minute id Fädere gschafft - aber er meint nur mit eme Grinse: er segi halt en Cisalpino - die hebid immer Verspätig :))))))))))
Scho wieder Friitig, 11. Juni - de Luca hät hüt z Hinwil anere Neueröffnig müessse go schaffe - und det händs en churzerhandand an Wurschtstand anegschtellt, woner hät müesse Servelat und Bratwürscht verchaufe - aber s hät em Spass gmacht...
...ja und vorig wieder sis langzognigi - Mamiiiiii :-)
Eb er nid "UUSNAHMSWIIS" e chli länger chönnti uufbliibe :-)
Scho wieder e Uusnahm??? Er strahled mich aa und meint -mir chönntid doch jetzt Aktionswuche mache :-)))
Ja, a Phantasie fählts em nid :-))) Aber ebe - es langwiiligs Kiddie würd mich no meh stresse.... :-)
 
(Aber ich glaub langsam, es wär e Uusnahm, wänn en mal am elfi im Näscht hetti :-)
 
Übrigens - sin Kommentar zu dem Fötteli chli wiiter obe: Ja toll - ich han kei Hose me aah :-)
Hüt isch er zu de Nici abdüüsed - uf Dotnacht...
Sooooo und wie fangt die nöi Wuche aa, wänn mer sötti go Schäfli zelle ??? Mamiii - därf ich nid uusnahmswiis :-))))))))))))))
was jetzt wieder für e Uusnahm??? D Aktionswuche segi dure - meint de Sohnemann - aber öb mer jetzt nid WM Uusnahm chönni mache :-)))))

Mittwuch, 16. Juni
So Hopp Schwiiz - gäge Spanie händ sie ja gwunne - mir gaht das ja ziemli näbedbi vorbi.....
Aber ebe - mer bringts nid übers Härz...
De Luca will natürli morn für id Schuel unbedingt sis Schwiiz Liibli aalegge - nur isch das grad nid gwäsche... und de Huusmaa Gery überchunnt grad e chli e schlächti Quali vom Sohn .... De Daddy hetti ja de ganzi Tag de Zyt - was macht er eigentlich de ganzi Tag????
Jä nu, s Buech vo de Jodi Picoult wird morn no glich spannend sii - also
Tischi us em Wöschchorb usesueche und vo Hand uuswäsche - Flüssigwäschmitttel hämmer natürli nid im Huus - nur die "Chlötz" wo de Gery id Wäschmaschine rüert - aber das chan ich für eis Tischi nid bruche -  also es bitzli Duschmittel, Weichspüeler und en Schuss Shampoo is Lavabo - Liibli drin umepansche - ziemlich unkonventionell - aber hät funktioniert :-)))))))))
Und dänn das Liibli no trocheföne :-(((( Hät ja e Ängelsgeduld bruucht ....
Tröchne i de Mikro wär au no e Alternative gsi - zwei Minute dreihe laa - Tüürli uf zum uslüfte - wieder zwei Minute - und so wiiter und so fort... - aber das hämmer ziemli schnäll verworfe - laufed zwei PC und de Fernseh - und bi üsere uralte Wohnig mit 6 Ampere - hettis sicher nah ere halbe Minute d Sicherig useghaue....
Friitig 18. Juni... nöi Siite - D Lehr und de Teeniebricht Siite 3 - ab jetzt ischs nöischti uf em Teeniebricht immer z oberscht.......